2005-03-21
أعظم جروحي من المحبوب
أعظم جروحي من المحبوب = وأكثر اسايه من الأحـباب
بالحب انا دايـم المغلـوب = ما اقدر اسكر عليه البـاب
ما تبت انا فالهوى ما اتوب = زود عنايه وراسـي شـاب
وأهل الوفا قدرهم محسوب = وأهل الردى عايشين أغراب
أمـوات لكن بـدون جنوب = بأهـل الردى ما يفيد عتاب
شليـلهم من شلـيل عيوب = لو ما فهم ما حسبنا حساب
ما يحشم الناس غير قلوب = نبراس محشومة الأشنـاب
فتشت انا قلبي المحجـوب = لقيته اصغر من المحسـاب
تحميله اكثر من المطلـوب = اكبـر ملفاتـه الأصـحاب
اوسط ملفاته اللـي ينـوب = الوقت يمضي بدون حساب
واصغر ملفاته المشطـوب = بايد قديـم وعليـه تـراب
ما سرني عاشق المرغـوب = للنفس إلا بعـد مـا ثـاب
القلب لو يسمع الحاسـوب = نظم كيانه وجوفـه طـاب
بتسبيح واحد عليم غيـوب = الهمه يجري وراء الاسباب
ولابد يصبر على المكتـوب = والعقل نوره بعلـم كتـاب
لو كان قاصر عظيم اسلوب = عقل الفتى يضبط الاعصاب
والقلب مثل الهرم مقلـوب = والعقل خيمة عليها اطنـاب
صالح محسن الجهني