اللاعب اللي لقّبوه الحكومة ... بعد العمادة انتقل للزعامة

انتقال اللاعب كريم بنزيما من نادي الإتحاد إلى نادي الهلال

اللاعب اللي لقّبوه الحكومه

بعد العماده انتقل للزعامه

صفقه تجاريه وليه الخصومه

لاعب وبالصندوق عنده إقامه

له حومةٍ بريال مدريد حومه

فاقت مشاهير الفلس والندامه

في نادي النمر القويه عزومه

حقق كؤوس وجاب أفضل علامه

وما دام وسط السوق تكبر حلومه

والسعر مغري بين خامه وخامه

يبحث عن الأموال في كل كومه

رأسه بوسط العشب ما هو نعامه

والتاجر اللي بخط طغراء ختومه

يقدر يصيد البنز صيد الحمامه

صاده وجابه للحكومه حكومه

النادي اللي مثل زرقاء اليمامه

من بحر جدة بعد غطسه وعومه

بين البَخَتْري والنفل بالثمامه

ومن عندنا من يوم ضاعت علومه

واغراه حب المال درب السلامه

وما للرياضه دور في كل سومه

وما للنوادي غير حب وكرامه

والخصخصه إنجاز ما فيه لومه

في عالم الكورة جمال وفخامه

واللي سبقونا قالوا عنها خدومه

تنهي ظروف البلبله والملامه

صالح محسن الجهني

خط طغراء: مزيج بين خطي الديواني والإجازة، وقد استخدم على النقود الإسلامية وطوابع البريد والأختام