قصيدة شاعر القوات الجوية ردا على الزملاء الأعزاء مليح حسين السهلي ونايف دغيليب العتيبي

قصيدة شاعر القوات الجوية ردا على الزملاء الأعزاء مليح حسين السهلي ونايف دغيليب العتيبي

2016-12-14

قصيدة شاعر القوات الجوية ردا على الزملاء الأعزاء مليح حسين السهلي ونايف دغيليب العتيبي

الأخ والزميل العزيز مليح السهلي بعد خروجه من المستشفى ونجاح عملية قسطرة القلب ولله الحمد على سلامته ارسل لي على قروب دورتنا بيت من الشعر يقول فيه أبو حازم


القلب يا صالح حداني على الشين 
وطرد الهوى سدد شرايين قلبي

 

مليح حسين السهلي


...................................


فأرسلت له هذا الرد


سلامتك يا راعي المذهب الزين
لولا الهوى ما فيه شرقي وغربي

 

وما كان قلب المرء يأمر على العين
وينطق لسان أهل الهوى شعر شعبي

 

ومن الهوى كلٍ شكى سطوة البين
وما فيه ناجي غير من هو يخبي

 

سلامتك يا رأس عالي عن الشين
الله يديمك والدواء ريم مخبي

 

على هدى الهادي وفي عام ألفين
يا كثرهن نعم الأدب والمربي

 

فيهن حياء أثر على وجّنة العين
مثل الزهور النادية لون عشبي

 

ويا صاحبي نعم الرجل زوج ثنتين
شرواك راع الطيب لا تقول حسبي 

 

وأنا الذي مشتاق مدري على فين
راحت بي الدنيا وزادت في غلبي 

 

والحمد للرحمن ما نعيش عمرين
شايب ويا رحمان غفران ذنبي

 

سلامتك أجمل خبر والوفاء دين
يا من شفاك الله بعلاج طبي

 

والقسطرة للقلب ما بين عرقين
سبحان من حنّا لبيته نلبي

 

اللي خلق كل شي في ظرف يومين
قادر على كل شي ربك وربي

 

نسأله يجزاكم على الصبر أجرين
والعافية والخير دربك ودربي

 

صالح محسن الجهني


........................................


رد  الأخ والزميل العزيز نايف دغيليب العتيبي - رحمه الله 
يقول أبو فيصل : هذا الرد لأخوي مليح شفاه الله. مداعبة أخوية

 

يا الله يا المعبود طالبك ثنتين
قلبٍ سليم ومسلكٍ مستحبي

 

وأنك تعاوني على العسر واللين
وتمدني بالمغفرة يوم ألبي

 

الحمد لله زائل البأس يا شين
بس أنتبه من بعدها لا تطبي

 

صبت مواصيرك وما عاد بك شين
والقلب ينبض بالحياة متعبي

 

بالك تعود للهوى والمزايين
إلا مع اللي لا دعيته يلبي

 

غروٍ إلى اقبل يسرق القلب والعين
ضحكة حجاجه للمعنين طبي

 

يلقاك بالترحيب والمقعد الزين
والعود الأزرق ينثره فالمشبي

 

ويصب لك كأس الغلا فالشرايين
ينسيك همٍ فالضمير متخبي

 

نايف دغيليب العتيبي