المنتخب السعودي كأس اسيا - الصين 2004م

بمناسبة مشاركة منتخبنا الوطني الأول بكأس اسيا في جمهورية الصين الشعبية 19 - 7 - 2004 م

قلبي أخذني لسور الصيـن = اسأل عن اللي شغل بالـي

يكفيني أن العـرب داريـن = هذا الوطـن عندنـا غالـي

ونشدت عنهم أهـل بكيـن = من شافهم يا بعـد حالـي

قالوا ترى عيالكـم زينيـن = تعادلـوا حظهـم عـالـي

قلت النتيجة بهـا راضيـن = والحمـد للبـاري الوالـي

نبغى حصون الدفاع تليـن = بهجوم مـدروس متوالـي

تطويق خط الوسط تأميـن = ثم إلتفاف ورمـي صالـي

من يستغل النجـاح يبيـن = يطرد خصومـه ولا يبالـي

والله يشهد يا حرف السيـن = ما افك مـن حبـك حبالـي

لا زلنا في بحرهـا راسيـن = ما يطيح من راسي عقالـي

من قدرة الله بهـا ماشيـن = ما نعشق المركـز التالـي

يا الرامي ارمي على الرامين = صيدات شبل الوغى جزالي

واهل العزايم بهـا ماضيـن = إن وحدوا صـف الابطالـي

خضر الفنايل شعار الديـن = تاريخهـم ناصـع الجالـي

واعيالنـا فرحونـا سنيـن = شجعتهـم مانـي لحـالـي

أهدوهم الـورد والياسميـن = والمقبلـه طعمهـا حالـي

صالح محسن الجهني