مجاراه لقصيدة أنشودة الماء الرائعة للشاعر القدير (البعيد) عبدالله

مجاراه لقصيدة أنشودة الماء الرائعة للشاعر القدير (البعيد) عبدالله

القصيدة الخالدة والرائعة للشاعر القدير عبدالله ( البعيد ) وهي بعنوان ( أنشودة الماء ) ومجاراتي المتواضعة لها عندما نشرها الشاعر في المجالس الينبعاوية.

من نقطة العوده الـى اللاعـوده = صار الغلا وسط الخفوق يـزودي

من نبض شرياني بديت حـدوده = لين انتشر في دنيتـي ووجـودي

اختم على حبـك بختـم الجـوده = حبك وطن يعني غـلاك حـدودي

تبنين فيه صروحـك المشهـوده = وابني على صرح الغرام سـدودي

مثل السعوديه ...بلـد موجـوده = لكنّهـا تسكـن بكـل سـعـودي

قولي لهم: انك علـي محسـوده = وانا بقول: اني بهـا محسـودي

بأقول: فرحة خافقـي وسعـوده = وأقول:هي عطري وكـل ورودي

دلعتهـا وسميتهـا : ........... = وهي دلعتنـي عندهـا عبّـودي

وان كذبوا فيض الشعـور وزوده = اخذت من نبض الخفوق شهودي

مااجي لهم بأعصابي المشـدوده = والله لأوريهـم ثلـوج بــرودي

لأسقيهم الماء من هماج عـدوده = واحرق مسامعهـم بسـمّ ردودي

مااترك عدوّي يوصل لمقصـوده = ماهيب من طبع وطبـع جـدودي

حافظ لخـوة صاحبـي وعهـوده = وش عاد وانتي قصدي ومقصودي

انا جمعت من القصيـد حشـوده = خلّيتهـم شعبـي وكـل جنـودي

فتّحـت كـل ابوابـه المسـدوده = وخلّيت حبّك مـن اهـمّ بنـودي

فارسك فارس ماتخيـب جهـوده = ماهمنـي الا طريـق صـعـودي

بأعزف على لحن الغرام انشـوده = انشودة البـاب القديـم العـودي

أنشودة المـاء لاغفـى بركـوده = اللي يشابـه بالركـود ركـودي

انشـودةٍ مـن دفتـري مفقـوده = ياما حصد منها الزمن محصودي

هذا قصيدي وانتـي المقصـوده = شعري وجودي من وراء موجودي

واليـا لقيتـي جثتـي ممـدوده = خلي من اوراق القصيد لحـودي

اسباب واعمار البشـر محـدوده = قولي: توفى يوم شاف صـدودي

حنيـت للعـوده الـى اللاعـوده = ودي احـس بقيمتـي ووجـودي

عبدالله - البعيد

.....

أبياتكـم بأوتادهـا مـشـدوده= والحبل والواسط بها ممـدودي

يا شاعر المعنى كريـم العـوده = مشاعري حضّرتهـا وشهـودي

مديت في دربي معـي بـاروده = أقنب قنيب اللي بها مرشـودي

ما خذتها ودي أصيـد الـدوده = لكنها هـي عزوتـي ونجـودي

ما صيد فيها غير شي به فـوده = وجنبتها مقناصهـا المقـرودي

في طرقتي ماشي على المسنوده = في دربها ترتع مـع المفـرودي

مستانسه والخير حنا شهـوده = في دارنا من نعمـة المعبـودي

دار ٍ لنا هي عشقنا المرشـوده = بقلوبنا تحيـا غلاهـا يـزودي

تاريخنا فيهـا ونسـل جـدوده = نفخر بهم في عزنا الموجـودي

في خطوتي لو إنهـا محـدوده = وقفت أريح صاحبـي ملهـودي

اخـذت زادي نعمـة ٍ محمـوده = وريحت نفسي واستعدت جهودي

ما بين قطف الورد من منشوده = اللي سقاها ربنـا ذا الجـودي

قطفت لي ورده بـدرب العـوده = وخليتها فوق الشـداد تنـودي

أسير فيها وصاحبي لـه قـوده = له مشيةٍ مثل الظباء معـدودي

حتى وصلنا دارنـا المقصـوده = وفيها لقينا المقعـد المحمـودي

صالح محسن الجهني